Cómplices

Amence escuro xa o terceiro día do 2019. Cáenos o mazazo da primeira asasinada pola violencia machista do ano cando aínda estabamos a asentar o estómago despois de comprobar como a prensa recollía esa mesma mañá un nauseabundo retrato dalgo chamado “calzonazos”. Máis gasolina ao lume machista que se emprega para matar mulleres. Para matarnos.

E será porque o tiñamos como propósito máis urxente do novo ano ou porque unha cousa se sumou coa outra, pero hoxe decidimos non calar máis. A asociación Xornalistas Galegas está aínda a agromar pero non podemos agardar máis para alzar a voz na defensa activa dun xornalismo feminista que loite pola igualdade real entre xéneros. Porque é tarefa inherente aos medios facelo.

A prensa ten a función de formar, informar e entreter e a responsabilidade de contribuír ao ben común, no que se cimentan, por exemplo, as políticas públicas de axudas económicas aos grandes grupos de comunicación. Non pretendan, por tanto, que pidamos por favor o que nos corresponde por dereito: medios –e profesionais- da comunicación rigorosos e honestos que impidan a discriminación de máis da metade da poboación mundial.

É tempo de facer pedagoxía, de explicar que non son violencias simétricas, e que esa violencia de xénero que minimizan opinadores malintencionados sen chisca de rigor nin no fondo nin nas formas que lamentablemente aínda atopan un oco nos nosos medios, afecta a miles de fogares galegos, a mulleres e fillos e fillas. De lembrarlles, lembrarnos a nós, compañeiras e compañeiros xornalistas, que cando publicamos este tipo de artigos somos cómplices dese maltrato, estamos exercendo violencia.

Alba Taladrid

Xornalistas Galegas chama aos medios a non difundir opinións que banalizan a violencia machista

A raíz da publicación dun artigo de opinión por parte de dous medios de comunicación galegos no día de onte, 2 de xaneiro do 2019, que aborda a violencia de xénero cun enfoque trivial,  Xornalistas Galegas chama aos medios a asumir a súa responsabilidade de non difundir informacións nin opinións que banalicen a violencia machista.

Dende o colectivo lembramos, tal como recolle a Declaración de Compostela, que “medios e xornalistas adoptarán un compromiso activo na denuncia da violencia de xénero, incentivando a toma de conciencia social sobre a problemática que comporta”. A Declaración subliña tamén que “ante este tipo de delitos non cabe a neutralidade”,

Seguir lendo “Xornalistas Galegas chama aos medios a non difundir opinións que banalizan a violencia machista”

Xornalistas Galegas reivindica o papel dos medios de comunicación na loita feminista

  • O colectivo participou nunha mesa redonda sobre Sororidade dentro do acto “A Autoorganización como resposta á violencia de xénero” organizado pola Rede de Mulleres Veciñais contra os Malos Tratos de Vigo

O colectivo Xornalistas Galegas reivindica o papel que deben xogar os medios de comunicación na loita pola igualdade de xéneros e contra a violencia machista. Así quedou de manifesto de novo a pasada semana no acto “A autoorganización como resposta á violencia de xénero”, organizado pola Rede de Mulleres Veciñais contra os Malos Tratos de Vigo, no que o colectivo participou como integrante da mesa redonda sobre Sororidade.

A través da voceira Alba Taladrid, Xornalistas Galegas solicitou ás entidades e axentes que traballan diariamente a prol do feminismo e pola erradicación da violencia machista “un voto de confianza para a prensa amiga” á que representa o colectivo na súa procura dun xornalismo feminista que loite contra o machismo imperante na prensa e pola desaparición definitiva das discriminacións de xénero.

Seguir lendo “Xornalistas Galegas reivindica o papel dos medios de comunicación na loita feminista”